Chief Minister chuan thusawiin, tunlaiin internet technology hmansual kawngah mipuite in ven a ngaih thu a tarlang a, internet kaltlang sum leh pai, mipat hmeichhiatna kawnga inbumna a tam dan a sawi bawk.

Serchhip bialtu MLA Lalduhoma chuan mawi lo taka video call a dawn ṭhin thu tarlangin, “Sextortion video call hi vawi 100 chuang ka dawng tawh a, nizan pawh khan vawi engemaw zat ka dawng a, ka block char char a, a ngai hian number tamtak an nei nge ni, a hrang hrang hi min bei tur hian tute emaw hian an ruai nge ni, hmeichhia vek hi an nia,” a ti.

“An pic te chu a nalh thei em em a, a tak tak ah an nih leh nihloh chu ka hrelo, tiang chuanin keipawhin beihna hi ka tawk nasa a, ka block tawh zawng zawng hi za chuang a ni tawh, an la rawn ti char char reng a ni,” a ti.

Chief Minister Lalduhoma chuan, IT lamah hma kan sawna kan tangkaipui em em laiin he hmasawnna hi misualte pawhin an lo hmang tangkai ve zel a. Internet kaltlanga inbumna a tam em em a, a pung zel emaw tih mai turin a awm. Heng sualna laka kan him theih nan mipuiten a chin kan hriat a ngai a, vawiinah Journalists ten a zirhona in han buatsaih hi lawmawm ka ti, a ti.

Seminar hi C. Lalrambuatsaiha, President, MJA Hqrs chuan a kaihruai a. C. Lalhminghlua President, Serchhip chuan inlawmna thu sawiin K. Zothanpara, General Secy, MJA Hqrs leh T. Biakchamliana, Secretary, MJA Serchhip ten report an pe a, Zonunsanga, Addl. SP, CID Crime chuan zirtirna a pe a ni.